
2018 Rhif 1211 (Cy. 247)
Ymadael Â’r Undeb Ewropeaidd, Cymru
Rheoliadau Deddf Cyfraith sy’n Deillio o’r Undeb Ewropeaidd (Cymru) 2018 (Diddymu) 2018
Gwnaed 21 Tachwedd 2018
Yn dod i rym 22 Tachwedd 2018

Mae Gweinidogion Cymru yn gwneud y Rheoliadau a ganlyn drwy arfer y pŵer a roddir gan adran 22 o Ddeddf Cyfraith sy’n Deillio o’r Undeb Ewropeaidd (Cymru) 2018 (“y Ddeddf”).
Yn unol â pharagraff 1(2) o Atodlen 2 i’r Ddeddf, gosodwyd drafft o’r offeryn hwn gerbron Cynulliad Cenedlaethol Cymru ynghyd â datganiad sy’n nodi barn Gweinidogion Cymru ynghylch a ddylai’r weithdrefn yn is-baragraffau (6) i (14) o baragraff 1 o Atodlen 2 fod yn gymwys i’r offeryn hwn.
Yn unol â pharagraff 1(3) o Atodlen 2 i’r Ddeddf, gosodwyd datganiad gerbron Cynulliad Cenedlaethol Cymru sy’n esbonio pam y mae angen darpariaeth i addasu deddfwriaeth sylfaenol.
Yn unol â pharagraff 1(6) o Atodlen 2 i’r Ddeddf, mae Gweinidogion Cymru wedi rhoi sylw i—
(a) unrhyw sylwadau,
(b) unrhyw benderfyniadau gan Gynulliad Cenedlaethol Cymru, ac
(c) unrhyw argymhellion gan bwyllgor yng Nghynulliad Cenedlaethol Cymru a chanddo’r gorchwyl o adrodd ar y rheoliadau drafft,
a wneir yn ystod y cyfnod o 60 o ddiwrnodau o ran y rheoliadau drafft.
Yn unol â pharagraff 1(7) o Atodlen 2 i’r Ddeddf, mae Gweinidogion Cymru wedi gosod datganiad gerbron Cynulliad Cenedlaethol Cymru—
(a) sy’n datgan a gyflwynwyd unrhyw sylwadau, a
(b) sydd, os cyflwynwyd unrhyw sylwadau, yn rhoi manylion y sylwadau hynny.

Yn unol â pharagraff 1(8) o Atodlen 2 i’r Ddeddf, cymeradwywyd drafft o’r rheoliadau drwy benderfyniad gan Gynulliad Cenedlaethol Cymru.
Enwi a chychwyn
1 

(1) Enw’r Rheoliadau hyn yw Rheoliadau Deddf Cyfraith sy’n Deillio o’r Undeb Ewropeaidd (Cymru) 2018 (Diddymu) 2018.
(2) Daw’r Rheoliadau hyn i rym ar 22 Tachwedd 2018.
Diddymu Deddf Cyfraith sy’n Deillio o’r Undeb Ewropeaidd (Cymru) 2018
2 
Mae Deddf Cyfraith sy’n Deillio o’r Undeb Ewropeaidd (Cymru) 2018 wedi ei diddymu.
Mark Drakeford
Ysgrifennydd y Cabinet dros Gyllid, un o Weinidogion Cymru
21 Tachwedd 2018