
2018 Rhif 1113 (Cy. 231)
Caffael Tir, CymruDigolledu
Rheoliadau Taliadau Colli Cartref (Symiau Rhagnodedig) (Cymru) 2018
Gwnaed 24 Hydref 2018
Gosodwyd gerbron Cynulliad Cenedlaethol Cymru 25 Hydref 2018
Yn dod i rym 3 Rhagfyr 2018
Mae Gweinidogion Cymru yn gwneud y Rheoliadau a ganlyn drwy arfer y pwerau a roddir i’r Ysgrifennydd Gwladol gan adran 30(5) o Ddeddf Digollediad Tir 1973 ac sy’n arferadwy bellach ganddynt hwy o ran Cymru:
Enwi, cychwyn, cymhwyso a dehongli
1 

(1) Enw’r Rheoliadau hyn yw Rheoliadau Taliadau Colli Cartref (Symiau Rhagnodedig) (Cymru) 2018 a deuant i rym ar 3 Rhagfyr 2018.
(2) Mae’r Rheoliadau hyn yn gymwys o ran Cymru.
(3) Yn y Rheoliadau hyn ystyr “y Ddeddf” (“the Act”) yw Deddf Digollediad Tir 1973.
Diwygio symiau rhagnodedig y taliad colli cartref
2 
Pan fo dyddiad y dadleoli ar 3 Rhagfyr 2018 neu ar ôl hynny—
(a) £59,000 yw uchafswm rhagnodedig y taliad colli cartref at ddibenion adran 30(1) o’r Ddeddf;
(b) £5,900 yw isafswm rhagnodedig y taliad colli cartref at ddibenion adran 30(1) o’r Ddeddf; ac
(c) £5,900 yw swm rhagnodedig y taliad colli cartref at ddibenion adran 30(2) o’r Ddeddf.
Dirymu ac arbed
3 

(1) Yn ddarostyngedig i baragraff (2), mae Rheoliadau Taliadau Colli Cartref (Symiau Rhagnodedig) (Cymru) 2017 wedi eu dirymu.
(2) Bydd y Rheoliadau y cyfeirir atynt ym mharagraff (1) yn parhau i gael effaith mewn perthynas â dadleoli sy’n digwydd cyn 3 Rhagfyr 2018.
Rebecca Evans
Y Gweinidog Tai ac Adfywio, o dan awdurdod Ysgrifennydd y Cabinet dros Lywodraeth Leol a Gwasanaethau Cyhoeddus, un o Weinidogion Cymru
24 Hydref 2018